Ига Свёнтек ўз юртидаги турнир чемпиони бўлди

Кутилганидек, мусобақа бош соврини мезбонлар вакиласи Ига Свёнтекка насиб этди. Дунёнинг биринчи ракеткаси бўлган Ига ҳал қилувчи финал учрашувида рақибасини сезмади. Польшалик теннис маликаси WTA рейтингининг 153-поғонасида бораётган германиялик Лаура Зигемундни мағлубиятга учратди - 6/0, 6/1.

Теннисчиларнинг ўзаро учрашувларидаги ҳисоб 2:0 кўринишига келди. Олтмиш тўққиз дақиқа давом этган баҳсда Свёнтек 1, Зигемунд 2 та эйс зарбасини амалга оширди. Брейклар 5 га 0 кўринишда бўлди. Ўз ватанидаги муваффақиятли иштирок Игага 280 рейтинг очкоси ҳамда 29,760 евро мукофот пули келтирди.

Эслатиб ўтамиз, Ига Свёнтекнинг чемпионлик йўли илк даврада ҳамюртимиз Нигина Абдураимовани мағлуб этишдан бошланганди.