20 ноя 10:34
Новости

Кураш

IKA Бош котиби ва Администрацияси раҳбари Пунага етиб келди + ФОТО

23-28 ноябрь кунлари Ҳиндистоннинг Пуна шаҳри миллий қадриятимизнинг бир бўлаги ҳисобланган кураш бўйича навбатдаги жаҳон чемпионатига мезбонлик қилади.

Ўз тарихида 13-маротаба ташкил этилаётган катталар ўртасидаги бу галги дунё биринчилигида сайёрамизнинг 70 га яқин давлатидан сара курашчилар гиламга чиқади. Ушбу мусобақа доирасида Халқаро Кураш ассоциацияси (IKA)нинг навбатдаги Конгресси ҳам бўлиб ўтади.

Ҳар икки муҳим тадбирга тайёргарлик ишлари билан танишиш мақсадида Халқаро Кураш ассоциацияси расмийлари - IKA Бош котиби, техник директори Муҳаммад Ризо Нассирий ҳамда Халқаро Кураш ассоциацияси Администрацияси раҳбари Мансур Мирзаевлар Пуна шаҳрига етиб келишди.

Мумбай халқаро аэропортида уларни Ҳиндистон Кураш ассоциацияси вице-президенти, техник раис Ражан Варгас, Бош котиб Лал Сингх ва Ҳиндистон кураш ассоциацияси масъулларидан Дҳармендра Малҳотралар кутиб олишди.

Муҳаммад Ризо Нассирий бошчилигидаги техник комиссия жаҳон чемпионати ўтказилувчи арена, иштирокчилар учун ажратилган меҳмонхоналарни кўздан кечиришни бошлаб юборди.

Маълумот учун, Ўзбекистон терма жамоаси делегацияси эртага тонгда Тошкент - Дубай - Мумбай авиарейси билан Пунага жўнаб кетади.