Ислам Махачев Илия Топурия билан Оқ уйда жанг қилишга розилик берди

Кеча 34 ёшини нишонлаган россиялик аралаш яккакураш устасини ҳам бу сценарий тўлиқ қониқтирмоқда. 

"Илия Оқ уйда жанг қилишни хоҳлайди, мен ҳам у ерда бўлишни истайман. Ўйлайманки, бу ММА ҳамжамияти учун катта жанг бўлади. Одамлар бу жангни хоҳламоқда, агар UFC истаса, биз буни амалга ошира оламиз. UFC’га Оқ уйдаги турнир учун катта жанглар кераклигини биламан. Бундан ортиқ жанг бўлиши мумкинми?", - деди Махачев.

Шу билан бирга, россиялик Топуриянинг ярим ўрта вазн тоифасига кўтарилишини маъқул кўради, аммо бу жанг енгил вазнда ўтиши мумкинлигини бутунлай истисно қилмайди.

"Агар у ярим ўрта вазнга кўтарилса, бу мен учун фақат яхши бўлади. Енгил вазнга тушиш мен учун қийин бўлади - бунинг учун Дана Уайт кўпроқ тўлаши керак бўлади. Дивизионнинг ўзгариши билан ҳаётим ҳам ўзгарди. Бир умр нима еяётганим ҳақида ўйлашга мажбур бўлдим. Энди мен машғулот лагеридан завқланаман, хоҳлаган нарсамни ейман ва табассум билан машқ қиламан.

Ўйлайманки, ўн килограммдан ортиқ вазн ташлаган одам ҳеч қачон 100 фоиз тикланмайди. Жангларга 60-70 фоиз тикланганимни ҳис қиляпман. 30 соат ичида тикланиш жуда қийин, аммо энди ўзим ҳам қафасда ўзимни қандай ҳис қилишимни кўришга ошиқяпман", - дея тушунтирди Махачев.

Агар Ислам 15 ноябрь куни Нью-Йоркда бўлиб ўтадиган UFC 322 турнирида Жек Делла Маддалендан ярим ўрта вазн тоифасидаги чемпионлик камарини тортиб олса, ўз ўрнида Илия келаси йил бошида енгил вазндаги камарини ҳимоя қилса, Махачев - Топурия жанги ҳақиқатга айланади.

Ташкилотнинг Оқ уйда АҚШ мустақиллигининг 250 йиллигига бағишланган байрам турнири 2026 йил 14 июнга режалаштирилган.