20 ноя 08:47
Новости

Бокс/ММА

Жастин Гэтжининг эҳтимолий рақиби ва жанг санаси айтилди

UFC енгил вазн тоифаси рейтингида иккинчи ўринни эгаллаб турган Жастин Гэтжининг эҳтимолий рақиби ва жанг санаси ҳақида маълумот берилди.

Унга кўра, америкалик аралаш яккакураш устаси ўзига тегишли BMF камарини ярим енгил вазнда собиқ UFC чемпиони Макс Холлоуэйга қарши ўтказиши мумкин. Бу ҳақда "Хайлайт"нинг менежери Али Абдел-Азиз хабар бермоқда.

"Ким 17 февраль куни BMF камари учун кечадиган Жастин Гэтжи - Макс Холлоуэй жангини кўришни истайди?", - дея ижтимоий тармоқдаги саҳифасида хабар қолдирган Абдел-Азиз.

Алининг бу эълони Холлоуэйнинг Жастин Гэтжи билан жанг учун енгил вазн тоифасига кўтарилиши мумкинлиги ҳақидаги гапидан уч ҳафта ўтиб айтилди. Агар бу жанг амалга ошса, Ислам Махачев ва Чарльз Оливейра ўртасидаги реванш жанги деярли тасдиқланган бўлади.

Маълумот учун, 35 ёшшли Жастин Гэтжи охирги иккита жангида Рафаэль Физиевни очколар ҳисобига кўра мағлубиятга учратди, даъвогарлар тўқнашувида Дастин Порьени нокаутга учратди. 31 ёшли Макс Холлоуэй ҳам кетма-кет иккита жангда зафар қучди. Аввалига Арнольд Алленни очколар ҳисобига кўра енгди, кейин эса Кореялик Зомбини нокаутга учрата олди.

Эслатиб ўтамиз, 17 февраль куни рақамланган UFC 298 турнири бўлиб ўтади. Оқшомнинг асосий жанги ярим енгил вазн тоифасида ўтказилиб, унда UFC чемпиони Александр Волкановски камарини даъвогар Илия Топуриядан ҳимоя қилади.