28 июн 10:18
Новости

Бокс/ММА

Жек Пол, Хулио Сезар Чавес, Рамирес, Дортикос тарозига чиқди

Бизнинг вақт билан эртага тонг саҳарда АҚШнинг Калифорния штати Анахайм шаҳридаги Honda Center аренада катта бокс оқшоми ўтказилади.

Most Valuable Promotions промоутерлик компанияси томонидан ташкил этилаётган оқшомнинг асосий жанги яримоғир вазн тоифасида америкалик блогер-боксчи Жейк Пол ҳамда собиқ жаҳон чемпиони мексикалик Хулио Сезар Чавес ўртасида бўлиб ўтади.

Жанг олдидан иштирокчиларни расмий тарозидан ўтказиш маросими ташкил этилди. 28 ёшли Жейк Пол 90,4 кг, 39 яшар Хулио Сезар Чавес эса 89,9 кг тош босди.

Турнирнинг co-main event жанги биринчи оғир вазнда WBA ва WBO йўналишлари чемпиони мексикалик Хильберто Рамирес ҳамда унинг WBA камарига кубалик мажбурий даъвогар Юниэль Дортикос ўртасида ўтказилади. Чемпион тарозида 90,5 кг, даъвогар эса 89,9 кг вазн қайд этди.

Шунингдек, Анахаймдаги бокс турнирида енгил вазнда собиқ жаҳон чемпиони Тевин Фармер келажаги порлоқ сифатида баҳоланаётган Флойд Скофилдга қарши рингга чиқади. Фармернинг тарозида кўрсатган вазни 61,2 кг, Скофилдники эса 61,1 кг экани ойдинлашди.

Эътиборлиси, ушбу бокс оқшомида аёллар ўртасида собиқ UFC чемпиони Холли Холм ҳам бокс қоидалари бўйича жанг ўтказади. Ўн икки йиллик танаффусдан сўнги бокс рингига қайтаётган Холм тарозида 61,9 кг, унинг рақибаси Йоланда Очоа эса роппа-роса 62 кг тош босди.