08 июл 14:30
Новости

Бокс/ММА

Жиу-житсу юлдузи Маркус "Бучеча" UFC`да дебют қилади

Бразилия жиу-житсу бўйича қора белбоғ соҳиби, грепплингда ADCC ва IBJJF турнирларининг кўп карра чемпиони Маркус "Бучеча" Алмейда фаолиятини UFC лигаси оғир вазн тоифасида давом эттиради.

Бразилиялик 35 ёшли аралаш яккакураш устасининг ONE Championship лигаси билан шартномаси якунига етди. Энди у 26 июль куни БАА пойтахти Абу-Даби шаҳрида ўтказиладиган UFC турнирида октагонга чиқади. Унинг дебют жангдаги рақиби словакиялик 33 ёшли Мартин Будай бўлади. Абу-Дабидаги турнирда ҳамюртларимиз Богдан Гусков ва Рамазон Темиров ҳам ўзларининг навбатдаги жангларини ўтказишади.

Маълумот учун, "Бучеча" ҳисобида профессионал октагонда ўтказилган 6 та жанг (5 та ғалаба ва 1 мағлубият) бор. У барча жангларини ONE Championship лигасида ўтказган. Альмейда ғалабали жангларининг барчасини биринчи раунддаёқ "финиш" қилган. Ягона мағлубиятини Умар Кейндан қабул қилиб олган. Сўнгги жангини ўтган йилнинг ноябрь ойида эронлик Амир Алиакбарини бўғиб қўйганди.

Мартин Будай эса UFC промоушенида 7 та жанг ўтказишга улгурган. 2023 йилнинг декабрь ойида фаолиятидаги ягона мағлубиятини Шамиль Газиевдан қабул қилиб олган. Ўшандан кейин у Андрей Орловский ва Уран Сатибалдиевни таслим этди.