14 ноя 16:45
Новости

Теннис

Карлос Алькарас 2025 йилни биринчи ракетка сифатида якунлайди

"Катта Дубулға" туркумига кирувчи турнирларнинг олти карра ғолиби ATP Finals қандай натижа билан якунланишидан қатъи назар йилни биринчи ракетка сифатида тугатади.

Испаниялик теннисчи Якуний ATP 2025 чемпионатининг гуруҳ босқичидаги барча уч учрашувда ғалаба қозонди. Алькарас учинчи турда дунёнинг тўққизинчи ракеткаси, италиялик Лоренцо Музеттини 6/4, 6/1 ҳисобида мағлубиятга учратди.

Ушбу ғалаба унга 2025 йилги теннис мавсумини дунёнинг биринчи ракеткаси сифатида якунлашини кафолатлади. Агар у мағлубиятга учраганида, бу мақомни бой бериши мумкин эди. Бунинг учун рейтингнинг иккинчи поғонасида бораётган италиялик Янник Синнер ATP Finals турнирининг барча учрашувларида ғалаба қозониши ҳам талаб этиларди.

Таъкидлаш жоиз, 22 ёшли Карлос фаолиятида иккинчи бор йилни сайёрамизнинг биринчи ракеткаси сифатида якунлайди.