10 янв 18:42
Новости

Теннис, Это интересно!

Мавсумнинг илк "Катта Дубулға" турнири - Australian Open'ни қайси юлдуз теннисчилар ўтказиб юборади?

Теги : Australian Open

Мавсумнинг илк "Катта Дубулға" турнири Australian Open'ни бир вақтнинг ўзида бир нечта юлдуз теннисчилар ўтказиб юборади.

Карлос Алькарас (Испания)

Турнирнинг асосий йўқотиши албатта АТР рейтинги етакчиси 19 ёшли испаниялик Карлос Алькараз бўлди. У мавсумолди машғулотда оёғидан жароҳат олди ва мавсумнинг илк "Улкан Тож" турнирини ўтказиб юборадиган бўлди.

Карлос US Open'нинг амалдаги чемпиони ҳисобланади. Бу унинг "Катта Дубулға" турнирларидаги илк чемпионлигидир. Australian Open'да у ҳали 3-босқичдан уёғига ўтолмаган.

Винус Уильямс (АҚШ)

42 ёшли теннис афсонасига wild card берилганди. Аммо Винус Окленддаги турнирда жароҳат олди. Унинг таклифномаси эса австралиялик Ким Бирреллга берилди.

Етти карра "Катта Дубулға" турнирлари чемпиони Australian Open'да яккалик баҳсларида ғалаба қозона олмаган, лекин у буни тўрт марта жуфтликда ва бир марта аралаш жуфтликда амалга ошира олган.

Наоми Осака (Япония)

Тўрт карра "Улкан Тож" турнирлари чемпиони ҳам Australian Open'ни ўтказиб юборадиган бўлди. Иштирокчилар рўйхатида у украиналик Даяна Ястремска билан алмаштирилди.

Осака икки марта мавсумнинг биринчи "Катта Дубулға" турнирида ғалабани қўлга киритган: 2019 ва 2021 йилларда.

Симона Халеп (Руминия)

Икки карра "Катта Дубулға" ғолиби ҳали ҳам вақтинчалик дисквалификация остида. Унинг допинг иши бўйича тергов ҳамон давом этмоқда.

Халепнинг Австралия Очиқ чемпионатидаги энг юқори натижаси 2018 йилда финалга чиқиши бўлган. Финалда у Каролин Возняцкига ютқазганди.

Гаэль Монфис (Франция)

36 ёшли Монфсни ўтган мавсумдаги жароҳатлар таъқиб қилишда давом этмоқда. 2023 йил ҳам у хоҳлагандек бошланмаяпти.

Аммо Гаэлда узоққа бориш учун яхши имкониятлар бор эди. Бир йил олдин у Australian Open'даги энг яхши натижасини такрорлаб, чорак финалга чиққанди.

Рейли Опелка (АҚШ)

25 ёшли америкалик теннисчи ҳам ҳалигача жароҳатлардан тузалмаган. 2022 йилда у Австралия Очиқ чемпионатининг учинчи даврасига қадар етиб борган ва у ерда Денис Шаповаловга ютқазган.