"Нефтчи" 22 йиллик тарихий натижасини такрорлади

Виталий Левченко шогирдларини биринчи даврада бирорта клуб бошини хам қила олмади. Водий жамоаси баъзи ўйинларда ирода намойиш этган бўлса, баъзиларида енгларини шимариб, оёқларидан нима келишини кўрсатиб қўя олди. 

"Нефтчи" сўнгги маротаба 2001 йил бутун даврани мағлубиятсиз тарзда ўтказган. 18 та жамоа иштирок этган ўша мавсумнинг биринчи даврасида фарғоналиклар 17 ўйинда 15 та ғалаба ва 2 та дуранг қайд этганди. 

Қайд этиш жоиз, ўша мағлубиятсиз серия иккинчи давранинг биринчи ўйинидаёқ чиппакка чиққан. "Дўстлик" майдонига сафар уюштирган "нефтчилар" 1:2 ҳисобида мағлуб бўлишган. 

Шунга қарамай, якунда Юрий Саркисян қўл остидаги жамоа чемпионликни тантана қилади. Шу билан бирга, "Нефтчи" ўз майдонидаги барча 17 учрашувда ғалаба қозонган.

Жорий мавсумдаги "Нефтчи"да мағлубият бўлмаса-да, муроса билан якунланган баҳслари кўплиги боис, жамоа 3-ўринда бормоқда. Фарғоналиклар жорий мавсум энг кўп дуранг қайд этган (7 та) жамоа бўлиб турибди. 

Маълумот учун, ўтган йили биринчи даврадан сўнг энг кўп дурангга "Олимпик" сазовор бўлганди, улар 8 та ўйинда муроса кўчасини танлаганди. "Нефтчи" эса мавсум давомида 8 марта таблодаги рақамлар сони бир хил бўлишини таъминлаганди.

"Нефтчи" иккинчи даврани "Металлург"га қарши ўйин билан бошлайди. Биринчи даврада водийликлар рақиб майдонидан 3:0 ҳисобидаги йирик ғалаба билан қайтганди. Шу билан бирга, жамоалар Ўзбекистон кубогида ҳам рўбарў келишди, унда 2:1 ҳисобида бекободликларнинг қўли баланд келди.