01 июл 10:26
Новости

Шахматы

Нодирбек Абдусатторов Руминия турнири етакчиларининг бири билан муросага келди

Теги : Нодирбек Абдусатторов Superbet Chess Classic Romania

Руминия пойтахти Бухарест шаҳрида шахмат бўйича "Grand Chess Tour" серияси доирасидаги "Superbet Chess Classic Romania" турнир давом этмоқда.

Ўз ичига 5 та турнирни жамлаган ушбу нуфузли шахмат мусобақасининг умумий мукофот жамғармаси 1,5 миллион АҚШ долларини ташкил этади. Унда ҳамюртимиз Нодирбек Абдусатторов (2766) ҳам ўз маҳоратини намойиш этяпти. Кеча 5-турда у қора доналарда Доммаражу Гукеш (Ҳиндистон, 2763)га қарши баҳс олиб борди ва дурангга имзо чекди.

Турнирнинг биринчи рақамли иштирокчиси Фабиано Каруана (АҚШ, 2805) франциялик Максим Вашье-Лаграв билан дуранг ўйнади. Кечаги барча партияларда дуранг натижа қайд этилгани эътиборга молик ҳолат. Бешинчи турдан сўнг Каруана 3,5 очко билан якка пешқадам бўлиб турибди. Ҳиндистонликлар Рамешбабу Прагнандҳа ва Доммаражу Гукеш 3 очко билан кучли учликка якун ясашган.

Бугун турнирда дам олиш куни сифатида эълон қилинган. Олтинчи тур партиялари эртага, 2 июль куни ўйналади. Абдусатторов ҳозирча 2 очко билан 8-ўринни эгаллаб турибди.

Маълумот учун, "Superbet Chess Classic Romania" турнирининг мукофот жамғармаси 350 000 АҚШ долларини ташкил қилади. Чемпион гроссмейстер 100 000 долларни қўлга киритади.

Турнир иштирокчилари: Фабиано Каруана (АҚШ, 2805), Ян Непомнящий (FIDE, 2770), Нодирбек Абдусатторов (Ўзбекистон, 2766), Доммаражу Гукеш (Ҳиндистон, 2763), Уэсли Со (АҚШ, 2757), Рамешбабу Прагнанандха (Ҳиндистон, 2747), Аниш Гири (Нидерландия, 2745), Алиреза Фирузджа (Франция, 2737), Максим Вашье-Лаграв (Франция, 2732), Богдан-Даньел Дяк (Руминия, 2680).

Ссылка :

Источник : olamsport.com

Рейтинг: