27 июн 11:22
Новости

Шахматы

Нодирбек Абдусатторов Руминия турниридаги иштирокини бошлади

Теги : Нодирбек Абдусатторов Superbet Chess Classic Romania

Кеча Руминия пойтахти Бухарест шаҳрида шахмат бўйича "Grand Chess Tour" серияси доирасидаги "Superbet Chess Classic Romania" турнири старт олди.

Ўз ичига 5 та турнирларни жамловчи ушбу нуфузли шахмат мусобақасининг умумий мукофот жамғармаси 1,5 миллион АҚШ долларини ташкил этади. Мазкур мусобақада ҳамюртимиз Нодирбек Абдусатторов (2766) ҳам ўз маҳоратини намойиш эта бошлади. Кеча 1-турда у оқ доналарда ҳаракат қилиб, ҳиндистонлик Рамешбабу Праггнанандҳа (2747) билан дурангга имзо чекди.

Биринчи турнинг икки партиясида ғалаба қайд этилди. Турнирда биринчи рақам остида сараланган америкалик Фабиано Каруана қора доналарда ўйнашига қарамай, франциялик Алиреза Фирузджани таслим этди. Ҳиндистонлик Доммаражу Гукеш эса мезбон шахматчи Богдан-Даньел Дякдан устун келди. Қолган партияларда томонлар муросага келишди.

Маълумот учун, "Superbet Chess Classic Romania" турнирининг мукофот жамғармаси 350 000 АҚШ долларини ташкил қилади. Чемпион гроссмейстер 100 000 долларни қўлга киритади.

Турнир иштирокчилари: Фабиано Каруана (АҚШ, 2805), Ян Непомнящий (FIDE, 2770), Нодирбек Абдусатторов (Ўзбекистон, 2766), Доммаражу Гукеш (Ҳиндистон, 2763), Уэсли Со (АҚШ, 2757), Рамешбабу Прагнанандха (Ҳиндистон, 2747), Аниш Гири (Нидерландия, 2745), Алиреза Фирузджа (Франция, 2737), Максим Вашье-Лаграв (Франция, 2732), Богдан-Даньел Дяк (Руминия, 2680).

1-тур натижалари. Фирузджа – Каруана 0-1, Гукеш – Дяк 1-0, Абдусатторов – Прагнанандха, Вашье-Лаграв – Непомняший, Гири – Со партияларида дуранг қайд этилди.