03 апр 17:35
Новости

Бокс/ММА

Оскар Де Ла Хойя Ортис - Спенс жангини ташкил қилмоқчи

Таниқли промоутер Оскар Де Ла Хойя яна бир ажойиб жанг устида иш бошлаган кўринади, у ўзаро техасликларни уриштириб кўрмоқчи.

Биринчи ўрта вазн тоифасида вақтинчалик WBC чемпионлик камари соҳиби бўлиб турган Вержил Ортис навбатдаги жангини яримўрта вазнда собиқ жаҳон чемпиони Эррол Спенсга қарши ўтказиши мумкин. Бу ҳақда Ортиснинг промоутери Оскар Де Ла Хойя хабар бермоқда.

Қизиқ томони шундаки, ҳар икки боксчи ҳам Техас штатида яшайди. Промоутернинг сўзларига кўра, айнан шу омил жангнинг томошабоп ўтишига замин яратар экан. Жанг "Даллас Ковбойс" футбол клубига тегишли катта стадионда ўтказилиши мумкин.

"Вержилда навбатдаги жанг учун вариантлар етарли. Тасаввур қилинг, агар биз бу жангни "Даллас" клубининг стадионида ташкил эта олсак, аренага мухлис сиғмай кетади. Бу жанг ҳақида ўйлаб кўриш керак", — дея FightHype нашрига интервью берган Де Ла Хойя.

Эслатиб ўтамиз, 27 ёшли Ортис кетма-кет иккита жиддий рақиблар билан жанг ўтказди. У аввалига украиналик Сергей Богачук, кейин эса ҳамюртимиз Исроил Мадримовни 12 раунд тўлиқ давом этган жангларда очколар ҳисобига кўра мағлубиятга учратди. Бир муддат аввал Де Ла Хойя Ортиснинг IBF чемпиони Бахрам Муртазалиев ҳам жанг ўтказиши мумкинлигини айтган эди.

Маълумот учун, 35 ёшли Эррол Спенс 2023 йилнинг ёзидан бери жанг ўтказмаяпти. Ўшанда у Теренс Кроуфордга ютқазиб қўйганди. Аввалроқ, Premier Boxing Champions компанияси Спенс учун биринчи ўрта вазнда WBC ва WBO йўналишлари чемпиони Себастьян Фундорага қарши жангни ташкил қилмоқчи бўлганди. Аммо Эррол Фундорага қарши рингга чиқишдан бош тортган эди.