Ўзбекистон чемпионатининг тантанали очилиш маросими бўлиб ўтди + ФОТО

Юртимизнинг барча ҳудудларидан келган кучли спортчилар, ёш истеъдодлар қўҳна Бухоро шаҳрида жам бўлишди. Илк кунги финал беллашувлари бошланиши олдидан Ўзбекистон чемпионатининг тантанали очилиш маросими ташкил этилди. Унда Бухоро вилояти ҳокими Ботир Зарипов сўзга чиқиб, йиғилганларни катта спорт байрами билан қутлади ва спортчиларга омад тилади. 

"Сўнгги йилларда юртимизда спорт соҳасига катта эътибор қаратилмоқда. Замонавий заллар барпо этилиб, миллий анъаналарга асосланган спорт мактаблари янгиланмоқда. Натижада халқаро мусобақаларда юртимиз шарафини муносиб ҳимоя қилаётган спортчилар сони тобора ортиб бормоқда. Бугунги чемпионат ҳам ана шу ютуқларнинг амалдаги пойдеворидир", - деди вилоят ҳокими. 

Тадбирда Ўзбекистон дзюдо федерацияси раиси Азизжон Камилов ҳам иштирок этди. Федерация раҳбари Бухоро вилоятида спорт, хусусан дзюдо ривожи учун катта ҳисса қўшаётган Ботир Зариповга миннатдорлик рамзи сифатида эсдалик совғаси топширди. 

Ўз ўрнида Бухоро вилояти ҳокими Азизжон Камилов ҳамда мусобақага супервайзер сифатида келган Қозоғистон дзюдо федерацияси вице-президенти, Осиё дзюдо иттифоқи рефери-директори, Олимпия ўйинларининг кумуш медали совриндори Асхат Житкеевга тарихий Бухоро рамзи акс этган эсдалик совғаси тақдим этди.