11 сен 09:08
Новости

Бокс/ММА

Ўзбекистонлик ММА мураббийининг шогирди UFC'га йўл олди

Бирлашган Араб Амирликларининг Дубай шаҳридаги TKMMA залида мураббийлик фаолиятини олиб борувчи ўзбекистонлик Ҳусан Мажлимовнинг шогирди UFC билан шартнома имзолади.

Гап шундаки, БАА вакили Моҳаммад Яҳья (12-3-0) UFC лигаси билан шартнома имзолади. У дебют жангини ўз юртида, аниқроғи, Абу-Даби шаҳрида ташкил этиладиган UFC 294 турнири доирасида америкалик Тревор Пикка (8-1-0) қарши ўтказади. Жанг прелим кард доирасида 3 раунддан иборат бўлади.

Аҳамиятлиси, Моҳаммад Яҳья ўзбекистонлик Ҳусан Мажлимов қўл остида шуғулланади. У фаолияти давомида Bellator лигасида ҳам 2 та жанг ўтказган. Жангларининг асосий қисмини маҳаллий UAE Warriors лигасида ўтказган.

Маълумот учун, айни пайтда кўплаб ўзбекистонлик ММА жангчилари ҳам айнан Мажлимов қўл остида машғулот олиб бормоқда. Куни кеча унинг залига швециялик таниқли UFC жангчиси Хамзат Чимаев ташриф буюргани ҳақида маълум қилган эдик.