Павлюченкова Турга қайтиш эҳтимоли ҳақида гапирди

Дубайдаги кўргазмали турнирда россиялик теннисчи май ойидан бери биринчи яккалик учрашувини ўтказди ва унда Ига Свёнтекга 4/6, 3/6 ҳисобида ютқазиб қўйди.

"Мен биринчи марта жиддий жароҳатдан фориғ бўлиб, узоқ танаффусдан сўнг қайтдим. Фаолиятим давомида ҳеч қачон жароҳат олмагандим. Тўғри, бир неча йил давомида тиззам билан боғлиқ муаммолар бўлган. Аслида Римдаги турнирдан кейин мавсумни якунлашим керак эди.

Ўшандан бери бу жуда кўп вақт ва куч талаб қилди, лекин бу яхши, чунки мен Турнинг энг ёш теннисчиси эмасман. Қайтишни интиқлик билан кутаман!

Менимча, ҳозир ҳам яхши ўйнайман ва янада яхшиланишим мумкин. Аммо ким билади, мен ярим йилдан кўпроқ вақтни ўтказиб юбордим ва бу йил фақат учта турнирда қатнашдим. Шунинг учун ҳозир ўйинимдан нима кутишни билмайман. Мен ҳақиқатан ҳам теннисдан завқланишни хоҳлайман", - дея Павлюченкованинг сўзларидан иқтибос келтиради Tennis.com.