Қибрайда хотира турнири ўтказилди ФОТОГАЛЕРЕЯ

Асли Хоразм вилоятининг Урганч тумани Чекка шоликор қишлоғидан бўлган Эгамберган ота турмуш ўртоғи Ёқутжон опа билан 60 йилдан ортиқ бир ёстиққа бош қўйиб, 9 фарзандни тўғри тарбиялаб, ўқимишли, илм-маърифатли қилиб  камолга етказишди.  

Ибратли турмуш кечирган ушбу оила узоқ йиллар аҳил-иноқ ҳаёт кечирди. Эгамберган ота темирчилик ва чорвачилик соҳаларида ҳалол меҳнати билан ҳурмат-эътибор топган ва ҳамиша элда азиз инсонлар, намунали оилалардан бўлишган. 

Эгамберган Бекчоновнинг фарзанди, "Азия элект-энергия юксалиш" МЧЖ раҳбари Бекназар Бекчонов ташаббуси билан ташкил этилган турнирда ушбу корхонанинг 60 нафар ишчи-ходимлари ўртасида шахмат-шашка, 100 метрга югуриш, турникда тортилиш, тош кўтариш, армрестлинг, халқада машқ бажариш ва кураш бўйича мусобақалар бўлиб ўтди. 

Қизиқарли ва муросасиз ўтган беллашувларда Мавлуда Аҳмедова, Раҳима Азимова, Охунжон Раҳмонқулов, Азиз Хожиев, Ойбек Кистабоев, Бахтиёр Абдуллаев сингари ишчи-ходимлари юқори натижалар қайд этиб, корхона раҳбари томонидан қимматбаҳо эсдалик совғалари билан тақдирланишди. 

Шунингдек, турли номинациялар бўйича ҳам ғолиблар аниқланди. Тадбирда Эгамберган отанинг фарзандлари, яқинлари ва кенг жамоатчилик иштирок этди.

Илҳом РАҲМОНОВ тайёрлади