Қозоғистон хоккейида можаро: "Торпедо" легионери жамоадошини ўлдирганликда гумон қилиняпти

"2024 йилнинг 2 август куни "Торпедо" (Усть-Каменогорск) ёшлар жамоаси дарвозабони Иван Пилёнок вафот этди. У 19 ёшда эди. Пилёнок 2022/23 йилги мавсумда асосий жамоа таркибида иккита ўйин ўтказишга муваффақ бўлган. Клуб Пиленёк "Муз спорти саройи"да касал бўлиб қолгани, шифокорлар ва ходимлар биринчи тиббий ёрдам кўрсатиб, тез ёрдам чақиргани ва у касалхонада вафот этгани ҳақида хабар берган эди.

Эндиликда Пиленёкнинг ўлими олдидан россиялик "Торпедо" ҳужумчиси Андрей Лагунов билан бўлган можароси акс этган видео пайдо бўлди. Orda.kz нашрининг ёзишича, можарога ишдан чиққан ҳаво совутгичи сабаб бўлган. Жанжалдан кейин Пилёнок йиқилиб, ҳушини йўқотганини кўриш мумкин. 24 ёшли Лагунов Қозоғистонда 2017 йилдан бери ўйнаб келмоқда: у "Торпедо" ёшлар жамоасига келиб, бир мавсумга "Ладя" (МХЛ) ва Қарағанданинг "Сариарка" клубларига бориб келган. Ўтган мавсумда у 51та ўйин ўтказиб, 18+19 очко жамғарган ва "Торпедо" билан Қозоғистон чемпионатининг кумуш медали соҳибига айланганди.

Икки томоннинг адвокатларига кўра, тергов иши якунига етган. Марҳумнинг яқинлари терговчилар мазкур ҳолатда Лагунов фойдасига қарор чиқарганини таъкидламоқда. Андрейнинг ўзи эса суд уни айбдор деб топган ҳолатда айбига иқрор бўлишга ва жазо олишга тайёр эканини билдирган.

Суд қачон бўлиб ўтиши эса номаълум.