“Шунқорлар” – 2025: Андижон вилояти жамоаси кубокнинг янги соҳиби!

Мазкур ўйинларни ўтказишдан асосий мақсад ёшларни Ватанга садоқат ва юксак ҳарбий-ватанпарварлик руҳида тарбиялаш, чақириққа қадар ёшларни Қуролли кучлар сафида хизмат қилишга қизиқишини ошириб бориш ҳамда уларни руҳан ва жисмонан чиниқтиришдан иборатдир.

Чирчиқ олий танк қўмондонлик-муҳандислик билимюртида ўтказилган “Шунқорлар” ҳарбий-спорт ўйинларининг финал босқичида Қорақалпоғистон Республикаси, Тошкент шаҳри ва вилоятларда истиқомат қилаётган 17 ёшдан 22 ёшгача бўлган 140 нафар ёшлардан ташкил топган 14 та жамоа учта блокдан иборат синовлардан ўтказилди.

“Ҳарбий-ватанпарварлик блоки”да жамоа аъзоларининг Ўзбекистон тарихига доир билимлари текширилди. Шунингдек, “Саф қўшиғи” ва “Биз – бир жамоамиз!” кўрик-танловлари ўтказилди. 

“Ҳарбий-амалий кўпкураш блоки”да жамоалар пневматик қуролдан ўқ отиш, ўқув гранатасини узоқликка улоқтириш ва ҳарбийлаштирилган эстафета бўйича беллашдилар. 

Ҳарбийлаштирилган эстафета доирасида эса ёшлар “АК-74” автоматини қисмларга ажратиш ва тўлиқ йиғиш ҳамда газга қарши ниқобни кийиб, белгиланган масофага югуриш шартларини бажардилар.

“Спорт блоки”да дуатлон, 100 метр масофага югуриш ва турникда тортилиш бўйича ўзаро мусобақалашдилар. “Шунқорлар” ҳарбий-спорт ўйинлари давомида ёшларнинг ғалабага кучли интилишлари, шижоатлари ва ҳарбийликка бўлган қизиқишлари яққол сезилиб турди.

Дўстона руҳда, шу билан бирга шиддатли ва муросасиз кечган “Шунқорлар” ҳарбий-спорт ўйинларининг республика босқичида Андижон вилояти жамоасининг қўли баланд келиб,“Ватанпарвар” ташкилоти Марказий кенгаши раисининг кубогини қўлга киритди.

Эслатибўтамиз, сўнгги уч йилдан буён Хоразм вилояти жамоаси ғолиб бўлиб, кубокни ўзида сақлаб келаётган эди. Иккинчи ўрин Тошкент вилояти, 3-ўрин эса Самарқанд вилояти жамоаларига насиб этди. Якунда ғолиблик ва фахрли ўринларни қўлга киритган жамоалар аъзолари “Ватанпарвар” ташкилоти, Ёшлар ишлари агентлиги ҳамда Ёшлар иттифоқи томонидан дипломлар ва қимматбаҳо совғалар билан тақдирланди.

Шунингдек, уч кун давомида спорт мусобақаларида белгиланган натижаларни қўлга киритиб, ягона спорт таснифининг меъёрий талабларини бажарган 6 нафар йигит ва қизлар учинчи спорт разрядларига эга бўлдилар.

Таъкидлаш жоизки, республика миқёсида ўтказиб келинаётган “Шунқорлар” ҳарбий-спорт ўйинлари “Ватанпарвар” ташкилотининг “Ватанпарварлик – олий мақсадимиз!” концептуал ҳарбий-ватанпарварлик ғояси остида ёшларни бирлаштиришга мустаҳкам замин яратди.

2025 йилнинг март ойида “Ватанпарвар” ташкилоти Марказий кенгаши, Ёшлар ишлари агентлиги ҳамда бир қатор вазирлик ва идоралар ўртасида имзоланган “Ҳарбий-ватанпарварлик спартакиадаси” доирасида ёшлар ўртасида ҳарбий-спорт мусобақалари ҳамда ҳуқуқий танловларни ташкил этиш ва ўтказиш тўғрисида”ги қўшма қарорига мувофиқ, “Шунқорлар” ҳарбий-спорт ўйинларининг туман (шаҳар), ҳудудий ва республика босқичлари ўтказилиши белгиланган.

Яна бир муҳим маълумот: “Шунқорлар” ҳарбий-спорт ўйинларининг байроғи ва эмблемаси яратилган бўлиб, асосий рамзи сифатида шунқор қуши танланган. Бу бежиз эмас, чунки шунқор лочинсимонлар оиласига мансуб кучли, абжир қуш ҳисобланади ва у кўчма маънода мард, жасоратли, кучли шахсга нисбатан ҳам қўлланилади.

Ўзбекистон Республикаси мудофаасига кўмаклашувчи “Ватанпарвар” ташкилоти Матбуот хизмати