Sinquefield Cup. Нодирбек Абдусатторов амалдаги жаҳон чемпиони билан дуранг ўйнади

Grand Chess Tour мусобақасининг бешинчи босқичи ҳисобланган ушбу турнирнинг мукофот жамғармаси 350 000 АҚШ долларини ташкил этади. Ғолиб шахматчи 100 000 долларга эга чиқади. Мусобақада дунёнинг 10 нафар кучли гроссмейстерлари бош соврин учун баҳсларга киришди. Улар орасида жаҳон чемпиони Нодирбек Абдусатторов (2762) ҳам бор. 

Турнирнинг 8-турида ҳамюртимиз қора доналарда амалдаги жаҳон чемпиони Дин Лижэнь (Хитой, 2745)га қарши баҳс олиб борди ва дурангга имзо чекди. Тўрт очкога эга Нодирбек 1 ғалаба, 6 дуранг ва 1 мағлубият билан турнир жадвалида қўшимча кўрсаткичларга кўра 4-ўринни эгаллаб турибди. Учинчи поғонадаги Усли Со (АҚШ, 2751)да ҳам 4 очко бор. 

Эътиборлиси, 8-турдаги барча партияларда томонлар муросага келишди. Мусобақада 5,5 очко билан пешқадамлик қилаётган Алиреза Фирузжа (Франция, 2751) бу турда қора доналарда Ян Непомняший (FIDE, 2767) билан дуранг ўйнади. 

Бугун мусобақанинг сўнгги 9-турида Нодирбек Абдусатторов оқ доналарда турнирнинг иккинчи рақамли иштирокчиси Ян Непомняшийга қарши баҳс олиб боради. Ғалаба қозонган тақдирда, мусобақани совриндорлар сафида якунлаши мумкин. 

Турнир иштирокчилари: Фабиано Каруана (АҚШ, 2793), Ян Непомнящий (FIDE, 2767), Доммараджу Гукеш (Ҳиндистон, 2766), Нодирбек Абдусатторов (Ўзбекистон, 2762), Уэсли Со (АҚШ, 2751), Алиреза Фирузжа (Франция, 2751), Рамешбабу Прагнанандха (Ҳиндистон, 2749), Аниш Гири (Нидерландия, 2746), Дин Лижэнь (Хитой, 2745), Максим Вашье-Лаграв (Франция, 2721).