19 мая 18:34
Новости

Теннис

Султоновнинг "Ролан Гаррос"даги учрашуви 55 дақиқагина давом этди

Бугун куннинг иккинчи ярмида Франция пойтахти Париж шаҳрида теннис бўйича "Катта Дубулға" туркумига кирувчи тўртта нуфузли турнирдан бири - "Ролан Гаррос" мусобақасининг саралаш баҳслари бошланди.

Хабар берганимиздек, French Open 2025 турнирида ҳамюртимиз Ҳумоюн Султонов ҳам ўз омадини синаб кўриши керак эди. Бироз аввал теннисчимиз иштирокидаги учрашув якунига етди.

Қуръа натижасига кўра, Султонов илк даврада испаниялик тажрибали теннисчи Альберт Рамос-Виноласга қарши кортга чиқди. Бор йўғи 55 дақиқа давом этган баҳсда 37 ёшли Альберт Рамос Ҳумоюнни ортиқча қийинчиликсиз мағлубиятга учратди - 6/1, 6/1.

Таққослаш учун, Ҳумоюн айни пайтда ATP рейтингида 224, ўз вақтида дунёнинг 17-ракеткаси бўлган Рамос эса 248-ўринни эгаллаб турибди. Бу теннисчиларнинг ўзаро илк учрашуви бўлди. Иккала теннисчи ҳам бугун 3 тадан эйс зарбасини ижро этишган.