Тони "Эл-Кукуй" Фергюсон навбатдаги жанги ҳақида хабар берди

Америкалик 40 ёшли "Эл-Кукуй" 2025 йилда ҳам профессионал фаолиятини давом эттиришини маълум қилди. У навбатдаги жанги учун рақибини билишини ҳам айтди. 

"Мен артист сифатида шу пайтгача кўрсатмаган хунаримни намойиш этмоқчиман. 2025 йил учун режаларим бисёр. Янги миссия тасдиқланди. Янгиликларни кузатиб боринг - тез кунда жангим расман эълон қилинади. Ҳозирча рақибимнинг исм-шарифини айта олмайман", - деди "Эл-Кукуй". 

Маълумот учун, Тони Фергюсон ўтган йилнинг август ойида кетма-кет саккизинчи мағлубиятини қабул қилиб олганди. У Абу-Дабида ўтган UFC on ABC 7 турнирида ҳамюрти Майкл Кьезага имкониятни бой берган эди. Майкл номдор рақибини биринчи раунднинг ўзида бўғиб қўйганди. 

Ўша жангдан кейин UFC раҳбари Дана Уайт Тони Фергюсонни нафақага чиқишга чақирганди. Лекин енгил вазнда собиқ вақтинчалик UFC камари соҳиби ҳамон промоушен ростерида турибди.