U-23 Жаҳон чемпионати. Аброр Атабаев кумуш, Ҳожиакбар Қўчқоров эса бронза медалини қўлга киритди

Кеча мусобақанинг иккинчи куни доирасида Ўзбекистон юнон-рум кураши терма жамоаси иккита медалга эга чиқди.

55 кг вазн тоифасидаги вакилимиз Ҳожиакбар Қўчқоров мусобақа бронза медали учун кечган баҳсда эронлик Армин Саади Шамсипуражига ҳеч қандай имкон қолдирмади — 8:0. Бу жамоамизнинг мусобақа доирасидаги илк медалига айланди. Шу тариқа, 18 яшар Ҳожиакбар Қўчқоров U-23 Жаҳон чемпионатида учинчи бўлди.

Бундан ташқари, тажрибали Аброр Атабаев (72 кг) ЖЧ финалига қадар етиб борди. У ҳал қилувчи баҳсда Эрон вакили Хуссейн Моҳаммадига имкониятни бой берган бўлса-да, терма жамоамиз ҳисобига кумуш медални тақдим этди.

Ҳозирда Ўзбекистон делегацияси ҳисобида 1 та кумуш ва 1 та бронза медали мавжуд. Мусобақада аёллар кураши ва юнон-рум кураши бўйича баҳслар давом этмоқда.