11 сен 08:56
Новости

Дзюдо

Уч карра Олимпия ўйинлари совриндори Ришод Собировни табриклаймиз!

Бугун Ўзбекистон спорти тарихидан жой олган, Олимпия ўйинларининг уч карра бронза медали совриндори, икки карра жаҳон чемпиони, Осиё чемпиони, "Ўзбекистон Республикасида хизмат кўрсатган спортчи", "Ўзбекистон ифтихори" фахрий унвони, "Эл-юрт ҳурмати" ордени соҳиби Ришод Собиров ўз таваллуд кунини нишонлаяпти.

Ришод Собиров 1986 йил 11 сентябрь куни Бухоро вилоятининг Жондор тумани, Бурбоғи қишлоғида туғилган. Дзюдо билан 11 ёшида Рустам Тўраев қўл остида шуғулланишни бошлаган. Мураббийи Андрей Штурбабин. У илк халқаро миқёсдаги совринини 2006 йилда қўлга киритган. Ўшанда Ришод Хитой Тайпейида бўлиб ўтган ёшлар ўртасидаги Осиё чемпионатида биринчи ўринни эгаллаган.

2008 йилда Пекинда бўлиб ўтган Олимпия ўйинларида -60 кг вазн тоифасида бронза медали соҳибига айланган. 2010 йилда Токиодаги жаҳон чемпионатида ғолибликни қўлга киритди. Орадан бир йил ўтиб, Париждаги жаҳон чемпионатида икки карра жаҳон чемпионига айланди. Айнан ўша йили Халқаро дзюдо федерацияси томонидан дунёнинг энг яхши дзюдочиси деб топилган. 2012 йил Лондон, 2016 йилда эса Рио Олимпиадасида яна бронза медалларига эга чиққан.

Бугунги кунда пойтахтимизнинг Сергели тумани Қўйлиқ-5 даҳасида жойлашган 277-умумтаълим мактаби ҳудудида барча замон талабларига жавоб берувчи Ришод Собиров номидаги дзюдо мактаби фаолият юритмоқда.