03 янв 09:49
Новости

Бокс/ММА

UFC 299 турниридан ўрин олган яна бир қизиқарли жанг маълум бўлди

10 март куни АҚШнинг Флорида штати, Майами шаҳрида жойлашган "Kaseya Center" мажмуасида UFC 299 турнири ўтказилади.

Оқшомнинг асосий кардидан ўрин олган яна бир жанг маълум бўлди. Унда оғир вазн тоифасида АҚШ вакили Кёртис Блэйдс (17-4-0) бразилиялик Жаилтон Алмейда (20-2-0) билан тўқнаш келади. Жанг 3 раунд этиб белгиланган.

Бу ҳақда инсайдер Марсель Дорф хабар бермоқда.

Турнирнинг марказий жанги энг енгил вазн чемпионлиги учун Шон О'Мэлли ва Марлон Вера ўртасида кечади. Бундан ташқари, турнир доирасида Гилберт Бёрнс Жек Делла Мадделена билан, Петр Ян Сонг Ядонг билан жанг қилади.

Блэйдс - Алмейда жанги аслида 2023 йилнинг 5 ноябрь куни Бразилияда ўтказилиши керак эди, аммо ўшанда Блэйдс жароҳати сабаб жангга чиқа олмаган эди.

Эслатиб ўтамиз, 32 ёшли Кёртис Блэйдс сўнгги жангини 2023 йил апрель ойида Сергей Павловичга қарши ўтказиб, илк раунддаёқ нокаутга учраганди. Унинг тенгдоши Жаилтон Алмейда эса охирги жангини 2023 йил 5 ноябрь куни Деррик Льюисга қарши ўтказган ва очколар ҳисобига кўра ғалаба қозонганди.