16 ноя 19:27
Новости

Бокс/ММА

UFC 322 турнирининг бонуслари кимларга насиб қилди?

Бугун тонгда АҚШнинг Нью-Йорк шаҳрида ўтказилган ва кардида иккита чемпионлик жанги бўлган UFC 322 турнирининг бонус соҳиблари эълон қилинди.

Дунёнинг энг кучли лигаси одатдагидек тўрт нафар жангчига кафолатланган гонорардан ташқари қўшимча мукофот пулини тақдим этади. Тўрттада жангчи ҳам нокаут эвазига рақибларини мағлубиятга учратган. Уларнинг ҳар бири 50 000 доллардан оладиган бўлди.

Эътиборлиси шундаки, бу тўрттала жанг ҳам кетма-кетликда ўтказилди. Америкалик ўрта вазн тоифаси вакили Бо Никал учинчи раундда бразилиялик Родольфо Виейранинг бошига оёқ билан зарба йўллаб, рақибини нокаутга учратди. Унинг кетидан асосий кардни очиб берган франциялик енгил вазн жангчиси Бенуа Сен-Дени 16-сониядаёқ америкалик Бенил Дариушни нокаутга учратди.

Шундан сўнг, ярим ўрта вазн тоифаси вакиллари Карлос Пратес ва Майкл Моралес мос равишда Леон Эдвардс ҳамда Шон Брэдини нокаут эвазига мағлубиятга учратди. Эквадорлик Майкл Моралес бугунги ёрқин ғалабаси сабаб чемпионлик камари учун мажбурий даъвогарга айланди.