19 янв 09:09
Новости

Бокс/ММА

UFC чемпиони Валентина Шевченконинг рақибаси маълум

Аёллар ўртасида ўта енгил вазн (-57 кг) тоифасида UFC чемпиони Валентина Шевченко (23-3)нинг навбатдаги рақибаси маълум қилинди.

Қирғизистонлик чемпион 4 март куни АҚШнинг Невада штати, Лас-Вегас шаҳрида ўтказиладиган UFC 285 турнирида октагонга кўтарилади. Унинг рақибаси дивизион рейтингида тўртинчи ўринни эгаллаб турган мексикалик Алекса Грассо бўлади.

Маълумот учун, 34 ёшли Валентина Шевченко ўтган йилнинг июнь ойида ўз чемпионлик камарини еттинчи бор муваффақиятли ҳимоя қилганди. Ўшанда қирғиз аралаш яккакураш устаси Таила Сантосни очколар ҳисобига кўра мағлубиятга учратган эди. 29 ёшли Алекса Грассо эса тўртта ғалабали серия билан келмоқда. Охирги жангида у Вивиан Арауджодан устун келганди.

Эслатиб ўтамиз, UFC 285 оқшомининг марказий жанги оғир вазн тоифаси чемпионлиги учун кечади. Фрэнсис Нганнудан кейин вакант бўлиб қолган UFC камари учун Жон Жонс ва Сирил Ган баҳс олиб боришади.