28 мар 15:11
Новости

Бокс/ММА

UFC россиялик аралаш яккакураш усталари ўртасидаги қизиқарли жангни эълон қилди

Теги : UFC on ABC 6 Сергей Павлович Александр Волков

Хабар берганимиздек, 22 июнь куни Саудия Арабистони пойтахти Ар-Риёд шаҳри UFC турнирига мезбонлик қилади.

Промоушен томонидан яна бир қизиқарли жанг тасдиқланди. Оғир вазн тоифасидаги россиялик аралаш яккакураш усталари Сергей Павлович ва Александр Волков UFC on ABC 6 турнирида ўзаро тўқнаш келадиган бўлишди. Бу хабарни шахсан UFC раҳбари Дана Уайт эълон қилди.

Шу билан бирга Дана Уайт Александр "Драго" Волковнинг кейинги рақиби бразилиялик Жаилтон Алмейда бўлиши ҳақидаги хабарларни инкор этди. 35 ёшли Александр Волков 3 та ғалабали серия билан келмоқда. У Жаирзиньо Розенстрайк ва Александр Романовни нокаутга учратди, Таи Туивасани эса бўғиш усули билан мағлуб этди.

31 ёшли Сергей Павлович ўтган йилнинг ноябрь ойида вақтинчалик UFC чемпионлик камари учун кечган жангнинг 69-сониясидаёқ британиялик Том Аспиналлга нокаут билан ютқазиб қўйди. Унга қадар эса россиялик яккакураш устаси 6 та жангининг барчасида рақибларини биринчи раунднинг ўзида нокаут қилиб келаётганди.

Айни пайтда Сергей Павлович UFC оғир вазнлилар рейтингида учинчи, Александр Волков эса олтинчи ўринни эгаллаб турибди. Саудия Арабистонидаги ушбу оқшомнинг марказий жанги ўрта вазн тоифасида Хамзат Чимаев ва Роберт Уиттакер ўртасида бўлиб ўтади. Ушбу жанг ғолиби чемпионлик камари учун расмий даъвогарга айланади.