UFC Vegas 63. Марказий жангда техник нокаут ва оқшомнинг қолган барча натижалари битта хабарда

UFC Vegas 63 оқшомининг марказий жанги америкалик Келвин Каттар ҳамда британиялик Арнольд Аллен ўртасида ўтказилди. Жанг иккинчи раундда Каттарнинг тиззасидан олган жароҳати сабаб тўхтатилди. Келвин биринчи раундда тиззасини жароҳатлаб олган эди. Ҳакамлар техник нокаутли ғалабани Алленга тақдим этишди.

Турнирнинг сo-main event жангида UFC фахрийси Тим Минс фаолиятидаги кетма-кет иккинчи мағлубиятини қабул қилиб олди. У уч раунд якунларига кўра Макс Гриффинга очколар ҳисобига кўра имкониятни бой бериб қўйди.

UFC Vegas 63 оқшомининг қизиқарли жангларидан яна бири оғир вазн тоифасида ўтказилиб, унда беларуслик Андрей Орловский бразилиялик Маркос Рожерио де Лимага қарши октагонга кўтарилди.

Жанг биринчи раунднинг ўзидаёқ якунига етди. Де Лима бўғиш усули билан тажрибали рақибини мағлубиятга учратди. Бу Орловскийнинг фаолиятидаги 21-мағлубият бўлди. Унинг ҳисобида 30 та ғалаба ҳам бор. Ўз ўрнида де Лима ММАдаги 20-ғалабасини тантана қилди.

Грузиялик ўрта вазн тоифаси жангчиси Роман Долидзе биринчи раунднинг сўнгги дақиқаси ўтиб бораётган бир паллада америкалик Фил Хоусни нокаутга учратди. 

Шунингдек, ушбу оқшомда Трешин Гор, Юн Йон Пак, Стив Гарсия ва Кристиан Родригес ҳам навбатдаги ғалабаларини қўлга киритишди. Уларнинг бари рақибларини муддатидан аввал таслим этишган.