29 авг 08:56
Новости

Теннис

US Open. 21 та эйс Андрей Рублёвни учинчи даврага олиб чиқди

Россиялик теннисчи Андрей Рублёв "Катта Дубулға" туркумига кирувчи АҚШ Очиқ чемпионатининг учинчи давра иштирокчисига айланди.

Дунёнинг 15-ракеткаси бўлиб турган Рублёв иккинчи босқичда ATP рейтингида 113-поғонада бораётган америкалик Тристан Бойерга қарши кортга чиқиб, рақибини тўрт сет натижасига кўра мағлубиятга учратди - 6/3, 6/3, 5/7, 7/6(4). Бу теннисчиларнинг ўзаро ўтказган илк учрашуви бўлди.

Икки соату 58 дақиқа давом этган баҳсда Рублёв 21, Бойер 7 та эйс зарбасини амалга оширди. Қўшхатолар Тристанда биттага кўпроқ бўлди - 6 га 5. Брейклар бўйича Андрей устунлик қилди - 5 га 3. Энди Рублёв US Open учинчи даврасида Коулмен Вонгга қарши кортга чиқади. Гонконглик теннисчи ўз ўрнида иккинчи босқичда австралиялик Адам Уолтонни 7/6(5), 6/2, 4/6, 6/4 ҳисобида таслим этди.