26 авг 10:20
Новости

Теннис

US Open. Медведев қаторасига учинчи "Катта Дубулға" турнири стартидаёқ ютқазди

Дунёнинг 13-ракеткаси Даниил Медведев "Катта Дубулға" туркумига кирувчи АҚШ Очиқ чемпионатининг биринчи даврасидаёқ мағлубият аламини тотиб кўрди.

Россиялик теннисчи US Open илк босқичида ATP рейтингида 51-поғонада бораётган франциялик Бенжамен Бонзига 3/6, 5/7, 7/6(5), 6/0, 4/6 ҳисобларида имконияти бой бериб қўйди. Бонзи Медведев учун ноқулай рақиб бўлиб қолмоқда. Теннисчиларнинг ўзаро учрашувларда айнан у олдинда бормоқда - 3:1.

Уч соату 46 дақиқа давом этган баҳсда Медведев 21, Бонзи 7 та эйс зарбасини амалга оширган. Қўшзатолар Даниилда кўп бўлди - 10 га 4. Иккала теннисчи ҳам 6 тадан брейкка эришган. Энди Бенжамен US Open турнирининг иккинчи даврасида Маркос Гиронга қарши кортга чиқади. Америкалик бу теннисчи илк босқичда аргентиналик Мариано Навонедан устун келди - 6/0, 7/5, 4/6, 5/7, 6/4.