“Women’s Chess Championship 2025”. Шахматчи қизларимиз етакчилар сафида + ФОТОГАЛЕРЕЯ

Мукофот жамғармаси 50 000 АҚШ долларини ташкил этувчи ушбу халқаро турнирда дунёнинг 14 давлатидан 150 нафарга яқин аёл шахматчи бош соврин учун баҳсларга киришган. Турнир икки - А ва В гуруҳларида ўтказилмоқда. Кучлилар жам бўлган А гуруҳида рейтинги 1800 дан юқори бўлган шахматчилар дона суряпти. 

“Women’s Chess Championship 2025” турнири 9 турдан иборат бўлиб, швейцарча тизимда ўтказилмоқда. Унда Умида Омонова, Барчиной Шокиржонова, Афруза Ҳамдамова, Нодира Нодиржонова, Нилуфар Якуббоева сингари ўзбекистонлик шахматчилар ҳам баҳсларга киришган. 

Кеча халқаро мусобақада 4-тур учрашувлари ўтказилди. Уч имкониятдан 2,5 очко жамғарган Гулдона Каримова (2160) оқ доналарда рейтингда ўзидан анча юқорида турган сингапурлик аёл гроссмейстер Гун Цяньюнь (2272) билан дуранг ўйнади. Афруза Ҳамдамова ўзбек дербисида Мафтуна Бобомуродовани таслим этди. Нилуфар Якуббоева эса FIDE байроғи остида қатнашаётган россиялик Алёна Волчковадан устун келди. Умида Омонова қозоғистонлик Зейнеп Султанбек билан муросага келди. Нодира Нодиржонова рейтинги ўзидан баланд ҳиндистонлик Нандҳидҳага имкониятни бой берди. 

Бешинчи тур олдидан турнир жадвалида польшалик аёл гроссмейстер Алиса Сливичка (2342) юз фоизлик натижа (4 очко) билан якка пешқадамлик қиляпти. Россияликлар Полина Шувалова, Ольга Гирья ва эронлик Мелика Моҳаммади 3,5 тадан очко жамғариб, кейинги ўринларни банд этишган. Гулдона Каримова 3 очко тўплаганлар орасида энг яхши кўрсаткичга эга ва у 5-поғонадан жой олган. Уч очкога эга Афруза Ҳамдамова 9, Нилуфар Якуббоева 12-ўринни эгаллаб турибди. Маржона Маликова ва Умида Омонова ҳисобида 2,5 тадан очко бор.