10 апр 07:52
Новости

Хоккейчиларимиз катталар ўртасидаги жаҳон чемпионатига тайёргарликни давом эттиришмоқда + ФОТОГАЛЕРЕЯ

Теги : Хоккей

Хабарингиз бор, хоккей бўйича Ўзбекистон миллий терма жамоаси ўз тарихида илк бор Жаҳон Чемпионатида иштирок этади.

Март ойининг бошида ёшлар терма жамоамиз ўз ёш тоифасидаги Жаҳон Чемпионатида дебют қилганди. Таиланд бўлиб ўтган дебют мусобақа вакилларимиз учун муваффақиятли бўлди – ёшлар III B дивизионида ғалаба қозониб, нафақат чемпионликни, балки кейинги босқичга – III А дивизионига кўтарилишди ҳам.

Эндиликда ушбу ютуқни катта ёшли Миллий терма жамоамиз такрорлашга ҳаракат қилади. Шу йил 13-19 апрель кунлари улар Арманистон пойтахти Ереванда бўлиб ўтадиган IV дивизион мусобақасида ўз дебютини ўтказади.

Рақибларимиз Арманистон, Эрон, Қувайт, Индонезия ва Малайзия терма жамоалари бўлади. Уларнинг барчаси илгари жаҳон чемпионатларида иштирок этган, ягона дебютант эса – Ўзбекистон.

Миллий терма жамоамизнинг асосини U18 ёшлар терма жамоасининг чемпион йигитлари ташкил қилади, уларга бир неча йиллардан бери “Ҳумо” жамоасида ўйнаб келган катта ёшли хоккейчилар қўшилади.

Вакилларимиз айни пайтда мусобақага ҳозирлик кўришмоқда. Улар 11 апрель куни Арманистонга жўнаб кетишади.