Ёзги Универсиада якунланди. Тарихни янгилаган ўзбек спортчилари медаллар жамғариш бўйича нечанчи ўринни эгаллашди? (Барча маълумотлар)

Мазкур катта спорт фестивалида дунёнинг 113 давлатидан 18 та спорт тури бўйича жами 5 100 нафардан зиёд талаба-спортчи 234 та медаллар жамланмаси учун баҳс олиб борди. Ушбу комплекс мусобақа Германиянинг Бохум, Дуйсбург, Эссен, Мюльхайм-ан-дер-Рур, Хаген ва Берлин шаҳарларида ўтказилди.

Ўзбекистон спорт делегацияси ёзги Универсиадада 11 та спорт тури (камондан отиш, спорт гимнастикаси, енгил атлетика, сувга сакраш, дзюдо, бадиий гимнастика, эшкак эшиш, сузиш, стол теннис, таэквондо WT ва теннис бўйича 18 та олий таълим муассасаларида таҳсил олувчи 53 нафар спортчидан иборат таркиб билан иштирок этди.

Ўзбекистон спорт делегацияси мусобақа якунларига кўра 5 та спорт тури бўйича (сузиш, бадиий гимнастика, енгил атлетика, таэквондо WТ, дзюдо) 4 та олтин, 4 та кумуш, 7 та бронза, жами 15 та медаль қўлга киритди. 

Ушбу натижа билан Ўзбекистон спорт делегацияси 113 давлат орасида умумжамоа ҳисобида 13-ўринни, Марказий Осиё давлатлари орасида 1-ўринни эгаллалади. Япония 34 та олтин, 21 та кумуш, 24 та бронза медали билан биринчи ўриндан жой олди. Хитой 30 та олтин, 27 та кумуш, 17 та бронза медали билан 2-поғонани банд этган бўлса, узоқ вақт пешқадам бўлиб келган АҚШ якунда 28 та олтин, 27 та кумуш, 29 та бронза, жами 84 та медаль билан кучли учликка якун ясашди. Медаллар сони бўйича айнан америкаликлар тенгсиз бўлишди. 

Кучли ўнталикдан Корея Республикаси, Италия, Германия, Жанубий Африка Республикаси, Туркия, Хитой Тайпейи ва Польша терма жамоалари жой олишди. Қўшниларимиз Қозоғистон 37, Қирғиз Републикаси 38-ўринни банд этишди. Шу билан бирга, Ўзбекистон Универсиадалар тарихидаги энг яхши натижасини қайд этди.

Маълумот учун, 2013 йил Россиянинг Қозон шаҳрида бўлиб ўтган Бутунжаҳон ёзги Универсиада ўйинларида Ўзбекистон спорт делегацияси томонидан жами 19 та медаль (2 та олтин, 7 та кумуш ва 10 та бронза) қўлга киритилиб, якунда умумжамоа ҳисобида 24-ўринни эгаллагандик. 

2019 йил Наполи (Италия) шаҳрида бўлиб ўтган Бутунжаҳон ёзги Универсиада ўйинларида эса Ўзбекистон спорт делегацияси томонидан жами 8 та медаль (2 та олтин, 2 та кумуш ва 4 та бронза) қўлга киритилиб, умумжамоа ҳисобида 19-ўриндан жой олгандик. 

Шунингдек, Универсиадалар тарихида илк бор сузиш, бадиий гимнастика ва енгил атлетика спорт турларидан медаллар қўлга киритилди. Кеча мусобақанинг сўнгги куни енгил атлетика бўйича терма жамоамиз аъзоси Шарифа Давронова уч хатлаб сакраш дастурида ўзининг шахсий рекордини (14.30 м) янгилаб, 14.33 м натижа билан Ўзбекистон учун тўртинчи олтин медални қўлга киритди.