Забит Магомедшарипов қайтиши мумкинлигига ишора қилди

"Октагонда жанг қилаётганларни кўриб, ўзимнинг машғулотларимдан келиб чиқиб, фаолиятимни яна қайта тиклаш ҳақида фикрлар келади. Лекин бу масалани обдон ўйлаб кўриш керак. Ҳа, мен бу саволга қайтаман", - деди Забит. 

Магомедшарипов нима учун UFC промоушенидан кетганлиги ҳақида берилган саволга ҳам жавоб берди.

"Бунинг сабаблари кўп эди. Биринчи галда икки йил давомида жангсиз юриш. Тўлақонли ўқув-машғулот йиғинини қиласан, оз қолганида рақиб жангдан қочади. Иккинчидан, жароҳатлар кўпайиб кетди. Кейин чемпионлик камари учун жанг беришмади. Бир нарсани ваъда қилишарди, бажаришга келганда умуман бошқаси бўларди", - дея UFC промоушенидан кетганини изоҳлади Магомедшарипов. 

Эслатиб ўтамиз, 31 ёшли Забит Магомедшарипов сўнгги жангини 2019 йилнинг ноябрь ойида Москва шаҳрида ташкил этилган UFC турнирида Келвин Каттарга қарши ўтказиб, очколар ҳисобига кўра ғалаба қозонган эди.