17 июл 14:39
Янгиликлар
![](/upload/storage/305486_220.jpg)
Тьерри Анри, Маскерано, Кападзе... Олимпия ўйинларида ишлайдиган мураббийлар
24 июль Олимпия спорт ўйинларининг футбол мусобақасига старт берилади. Бунда 16та терма жамоа тўрт гуруҳга бўлинган ҳолда ғолиблик учун кураш олиб боради.
Ўз тарихида илк бор Олимпиада йўлланмасини қўлга киритган Ўзбекистон олимпия терма жамоаси гуруҳ ўйинларини Испания, Миср ва Доминикан Республикасига қарши ўтказади.
Олимпия ўйинлари нафақат футболчилар, балки мураббийлар учун ҳам муҳим турнир ҳисобланади. Бунда нафақат жамоалар, балки мураббийлар халқаро майдондаги кураш орқали ўз билим ва маҳоратларини текшириб олишади.
Мухлисларнинг терма жамоа устози Тимур Кападзедан умиди катта. Ўз навбатида Тимур Тоҳирович ҳам қандай масъулият турганини чуқур ҳис этиб турибди. Ўтган 4-5 йил ичида Кападзе мураббий сифатида анча ўсди, буни унинг қўл остидаги жамоалар қайд этган натижалардан ҳам билса бўлади.
Дунё эътиборини ўзига қаратадиган Олимпия ўйинларида ўз маҳоратини намойиш этадиган 16 нафар мураббий орасида Ўзбекистондан ҳам вакил борлиги биз учун шараф. Шу ўринда барча жамоалар устозларига бирма-бир тўхталиб ўтамиз. Улар орасида сиз танийдиган машҳурлар ҳам бор.
"A" гуруҳи - Франция, Гвинея, АҚШ, Янги Зеландия
Франция - Тьерри Анри (Франция)
Маълумот учун: Француз футболининг ёрқин вакилларидан бири Тьерри Анри 1977 йилда туғилган. Мураббийлик фаолиятини 2015 йил "Арсенал" U-19 жамоасида бошлаган. Шу пайтгача Бельгия миллий терма жамоасида ёрдамчи мураббий ҳамда "Монако", "Монреал" (Канада) клубларида бош мураббий сифатида фаолият олиб борган. Ўтган йилнинг август ойидан бери Франция олимпия термасини бошқариб келмоқда.
Гвинея - Каба Диавара (Гвинея)
Маълумот учун: Каба Диавара 1975 йилда туғилган. У 2021 йилдан бери Гвинея миллий терма жамоасини бошқариб келмоқда. Гвинеяга тўлиқ кўчиб кетмасдан Францияда яшаётган маҳал машҳур Canal+ телеканалида эксперт сифатида фоалият олиб борган.
АҚШ - Марко Митрович (Сербия)
Маълумот учун: Марко Митрович 1978 йилда туғилган. Мураббийлик фаолияти мобайнида "Чикаго Файр", "Ридинг" каби клубларда ёрдамчи мураббий бўлиб ишлаган. 2022 йил АҚШ U-19 терма жамоасини бошқарган. 2023 йилдан бери АҚШ олимпия терма жамоасини бошқариб келмоқда.
Янги Зеландия - Даррен Базели (Янги Зеландия)
Маълумот учун: Даррен Базели 1972 йилда туғилган. 2020 йилдан бери Янги Зеландиянинг турли ёшдаги терма жамоаларида ишлаб келмоқда. 2022 йил Янги Зеландия олимпия термасига бош мураббий этиб тайинланган.
"B" гуруҳи - Аргентина, Марокаш, Ироқ, Украина.
Аргентина - Хавьер Маскерано (Аргентина)
Маълумот учун: Яқин ўтмиш юлдузларидан бири Хавьер Маскерано 1984 йил туғилган. Унинг мураббийлик фаолияти 2021 йил Аргентина U-20 терма жамоасини бошқариш билан бошланди. Париж Олимпиадаси ёш мураббий учун дастлабки катта синов бўлади.
Марокаш - Тарик Сектиуи (Марокаш)
Маълумот учун: Тарик Сектиуи 1977 йилда туғилган. Мураббийлик фаолиятини 2013 йил бошлаган. Шу пайтга қадар "Видад", "Мағреб Фес", "Унион Туарга" каби клубларда ишлаган. 2021 йил БААнинг "Эмирейтс" клубини бошқарган. Шу йилнинг февраль ойида Марокаш олимпия термаси бош мураббийи этиб тайинланди.
Ироқ - Радҳи Шенаишил (Ироқ)
Маълумот учун: Радҳи Шенаишил 1966 йилда туғилган. Мураббий сифатида катта тажрибага эга. 2015 йилги Осиё Кубогида Ироқ терма жамоасини бошқарган. Бундан ташқари "Ал Шорта", "Эйр Форс", "Ал Завра" каби клубларда ишлаган. 2022 йилдан бери Ироқ олимпия термасини бошқариб келмоқда.
Украина - Руслан Ротан (Украина)
Маълумот учун: Руслан Ротан 1981 йил Полтавада туғилган. Футболчи сифатида фаолиятининг катта қисмини "Днепр"да ўтказган Ротан 2018 йилдан бери мураббийлик билан шуғулланиб келмоқда. Шу пайтгача Украина U-21 жамоаси, "Александрия" клубини бошқарган. Ўтган мавсумдан бери олимпия термасига устозлик қилмоқда.
"C" гуруҳи - Ўзбекистон, Миср, Испания, Доминикан Республикаси.
Ўзбекистон - Тимур Кападзе (Ўзбекистон)
Маълумот учун: Тимур Кападзе 1981 йилда туғилган. 2018 йил "Локомотив" таркибида футболчилик фаолиятини якунлаб, шундан бери мураббийлик касби билан шуғулланиб келмоқда. Маълум муддат "Қўқон-1912" ҳамда "Локомотив" клубларида ишлаган ушбу мутахассис 2021 йилдан бери Ўзбекистон олимпия терма жамоаси бош мураббийи саналади.
Миср - Рожерио Микале (Бразилия)
Маълумот учун: Рожерио Микале 1969 йил туғилган. 1999 йил мураббийлик фаолиятини бошлаган. Ўз пайтида (2015-2017 йиллар) Бразилия U-20 ва U-23жамоаларини бошқарган. 2021 йил "Ал Ҳилол"да ишлаган ушбу мутахассис 2022 йилдан бери Миср олимпия терма жамоасини бошқариб келмоқда.
Испания - Санти Дениа (Испания)
Маълумот учун: Санти (Сантьяго) Дениа 1974 йилда туғилган. Мураббийлик фаолиятини ёрдамчи мураббий сифатида 2009 йил Мадриднинг "Атлетико" клубида бошлаган. Кейинчалик Испания U-17 ва U-19 терма жамоаларида ишлаган. 2022 йилдан бери Испания олимпия термасига устозлик қилиб келмоқда.
Доминикан Республикаси - Ибаи Гомес (Испания)
Маълумот учун: Ибаи Гомес 1989 йилда туғилган. Асосан "Атлетик" Бильбаодаги ўйинлари орқали мухлисларга таниш. 2022 йилни "Депортиво" сафида ўтказиб, шу билан футболчилик фаолиятини якунлади ва мураббийликни бошлади. Шу йилнинг 23 февраль санасида Доминикан Республикаси U-23 терма жамоаси бош мураббийи этиб тайинланди.
"D" гуруҳи - Япония, Парагвай, Мали, Исроил.
Япония - Го Ойва (Япония)
Маълумот учун: Го Ойва 1972 йилда туғилган. Мураббийлик фаолиятини 2011 йил "Кашима Антлерс" клубида ёрдамчи сифатида бошлаган. 2017-2020 йиллар мобайнида "Кашима Антлерс" бош мураббийи бўлиб ишлаган. 2018 йил Осиё чемпионлар Лигасида ғолиб чиққан ушбу мутахассис 2021 йилдан бери Япония олимпия терма жамоасини бошқариб келмоқда.
Парагвай - Карлос Жара Сагиер (Парагвай)
Маълумот учун: Карлос Жара Сагиер 1950 йилда туғилган. 73 ёшли мураббий фаолиятини 1987 йилда бошлаган. Ўтган вақт оралиғида у бир нечта клубларда, шунингдек, 2004 йил Парагвай миллий терма жамоасида ишлаган. Ўтган мавсумдан бери эса Парагвай U-23 термасини бошқариб келмоқда.
Мали - Алу Бадра Диалло (Мали)
Маълумот учун: Алу Бадра Диалло 1969 йилда туғилган. 2002-2003 йилларда "Лион" ёшлар жамоасини бошқарган ушбу мураббий шундан бери ўз юртида ишлаб келмоқда. Бу мураббий бир пайтнинг ўзида ҳам Мали миллий терма жамоаси, ҳам олимпия термаси устози ҳисобланади.
Исроил - Гай Лузон (Исроил)
Маълумот учун: Гай Лузон 1975 йилда туғилган. Мураббийлик фаолиятини 2001 йилда бошлаб бунга қадар "Хапоэль Тель Авив", "Маккаби Петах Тиква", шунингдек Англиянинг "Чарльтон", Бельгиянинг "Стандарт" клубларини бошқарган. 2022 йилдан бери Исроил Олимпия термасига мураббийлик қиляпти.
Х.Холиқов.
Фикрлар