Пэдди Пимблетт - Жастин Гэтжи жанги учун захира варианти айтилди

Оқшомнинг асосий жанги енгил вазн тоифасида вақтинчалик чемпионлик камари учун кечади ва унда британиялик Пэдди Пимблетт америкалик Жастин Гэтжига қарши октагонга чиқади. Арман миллатига мансуб россиялик Арман Царукян ушбу баҳсни захира жангчиси сифатида суғурталайди.  

"Пэдди Пимблетт ва Жастин Гэтжи ўртасидаги жангда захирада бўламан. Яъни, агар улардан бири жароҳат олса, мен бир ҳафта, ўн кун, беш кун ичида учиб келишга тайёр бўламан. Шу боис, ўзимни ушлаб туришим, машқ қилишим, спарринглар ўтказишим ва бу жангларда ўзимга жароҳат етказмасликка ҳаракат қилишим керак. Пимблетт ва Гэтжи ўртасидаги жангдан кейин дам оламан", - деди россиялик жангчи Москвада бўлиб ўтган ACBJJ лигаси матбуот анжуманида.

Бугун Арман Москвадаги жиу-эитсу турнирида Мехди Байдулаевга қарши баҳс олиб боради. Икки ҳафтадан кейин эса уни Шарабутдин Магомедов, яъни Шара Буллетга қарши жанг кутмоқда.