17 ёшли Мирра Андреева "Ролан Гаррос" 1/2 финалида!

Айни пайтда WTA рейтингида 38-ўринни эгаллаб турган Мирра "Катта Дубулға" туркумига кирувчи "Ролан Гаррос" турнирининг 1/4 финалида дунёнинг иккинчи ракеткаси, беларуслик Арина Соболенкони мағлуб этишни уддалади - 6/7(5), 6/4, 6/4. Андреева теннисчиларнинг ўзаро учинчи учрашувига келиб илк бор номдор рақибасини таслим этди - 1:2.   

Икки соату 29 дақиқа давом этган баҳсда Андреева 4, Соболенко 3 та эйс зарбасини амалга оширди. Қўшхатолар россиялик теннисчида биттага кўпроқ бўлди - 7 га 6. Брейклар бўйича устунлик ҳам Мирра томонида - 8 га 6! 17 ёшли теннисчи фаолиятида илк бор "Катта Дубулға" турнирларининг 1/2 финалида ўйнайди.  

Унинг финал чиптаси учун кечадиган баҳсдаги рақибаси италиялик Жасмине Паолини бўлади. "Ролан Гаррос" якунларига кўра Андреева ўзининг рейтингдаги шахсий рекордини янгилайди. У камида дунёнинг 23-ракеткасига айланади. Агар чемпион бўла олса, яна ҳам юқорироққа кўтарилади.