18 ёшли Андреева фаолиятидаги тўртинчи WTA совринини қўлга киритди

Мусобақа бош соврини 18 ёшли Мирра Андреевага насиб этди. Дунёнинг саккизинчи ракеткаси бўлиб турган россиялик иқтидор эгаси ҳал қилувчи финал учрашувида WTA рейтингида 17-поғонадан жой олган канадалик Виктория Мбокони ортиқча қийинчиликсиз мағлубиятга учратди - 6/3, 6/1.

Теннисчиларнинг ўзаро илк учрашуви роппа-роса 1 соат давом этди. Бу вақт оралиғида Андреева 1, Мбоко 2 та эйс зарбасини амалга оширди. Қўшхатолар канадаликда кўпроқ бўлди - 3 га 1. Брейклар бўйича эса табиийки, Мирра устунлик қилди - 5 га 1. 

Бу Мирра Андрееванинг фаолиятидаги тўртинчи WTA соврини бўлди. WTA 500 тоифасидаги турнирларда эса илк бор чемпионга айланди. У эртага эълон қилинадиган янги рейтингда 7-ўринга кўтарилади. Аделаидадаги муваффақиятли иштирок унга 500 очко ҳамда 185 500 АҚШ доллари миқдорида мукофот пули келтирди. Мбоко эса 325 очко ва 114 500 $ ишлаб олди.