22 сен 13:26
Янгиликлар

Бокс/ММА

Бугун Шаҳрам Ғиёсов Севара Назархон қўшиғи остида рингга кўтарилади

Бугун Рио Олимпиадасининг кумуш медали совриндори, жаҳон чемпиони, ҳозирда профессионал боксда фаолиятини давом эттираётган Шаҳрам Ғиёсов Лондондаги машҳур “Уэмбли” стадионида ўзининг навбатдаги жангини ўтказади.

Ҳамюртимизга бугунги жангда никарагуалик Хулио Лагуна рақиблик қилади. Ғиёсов аренага Ўзбекистон Республикасида хизмат кўрсатган артист Севара Назархоннинг “Улуғимсан Ватаним” қўшиғи остида чиқиб келади. Севара “Уэмбли” аренасида ушбу хит таронага айланган қўшиғини жонли тарзда ижро этади.

Маълумот учун, Шаҳрам шу кунгача проф рингда тўрт маротаба жанг ўтказиб, уларнинг барчасида ғалаба қозонган (3таси нокаут билан). Лагуна эса 14та жангнинг барчасида ғолиб бўлган. Ўнта жангини муддатидан олдин якунлаган.

Эслатиб ўтамиз, бугун Тошкент вақти билан соат 22:00да бошланадиган жанг “УзРепорт” телеканали орқали тўғридан-тўғри намойиш этилади. Оқшомнинг марказий жанги супероғир вазн тоифасида учта йўналиш чемпиони бўлиб турган британиялик Энтони Жошуа ҳамда россиялик даъвогар Александр Поветкин ўртасида бўлиб ўтади.