Абдураимова Дубай турнирида яна бир кучли рақибасини таслим этди

Мукофот жамғармаси 100 000 АҚШ долларини ташкил этувчи ушбу турнирда ҳамюртимиз Нигина Абдураимова ҳам муваффақиятли одимламоқда. Мамлакатимизнинг биринчи ракеткаси илк даврада германиялик тажрибали теннисчи Сабин Лисицкини 6/3, 6/4 ҳисобида мағлубиятга учратганди. 

Нигина ҳозиргина якунига етган 1/8 финал учрашувида россиялик Екатерина Макаровадан ҳам устун келди. Бир соату 47 дақиқа давом этган баҳсда Абдураимова рейтингда ўзидан юқорида бораётган рақибасини 6/0, 2/6, 6/2 ҳисобларида таслим этди. Теннисчиларнинг ўзаро учрашувларидаги ҳисоб 2:0 кўринишига келди. 

Таққослаш учун, Абдураимова WTA рейтингида 245, Макарова эса 188-ўринни эгаллаб турибди. Теннисчиларнинг ўзаро илк учрашуви 2022 йилнинг 22 июнь куни Берлинда ўтказилиб, унда Нигина Екатерина Макаровани уч сет натижасига кўра мағлубиятга учратганди. Абдураимованинг 1/4 финалдаги рақибаси кечроқ маълум бўлади.