Абдусатторовнинг ғалабали юриши давом этади: мезбон икки марта мағлуб этилди, Нодирбек муддатидан олдин ярим финалда!

Соврин жамғармаси 400 минг АҚШ долларини ташкил этувчи баҳсларда ҳамюртимиз навбатдаги ғалабаларни қўлга киритди. 

3 ва 4-турда у мезбонлар вакили, исландиялик Хьйёрвар Стейн Гретарссонга қарши дона сурди ва ҳар иккала партияда ҳам ғалаба қозонди. 

Бунгача Ян Непомняший ва Уэсли Сони мағлуб этган Нодирбек ўз ҳисобидаги очколар сонини 8 тага етказиб олди ва гуруҳ босқичи якунланишига 2 тур қолганда ярим финал масаласини ҳал қилди. 

Энди бугун Абдусатторов 5 ва 6-тур ўйинларини ўтказади. Нодирбек 5-турда Ян Непомняшийга қарши иккита ўйин ўтказса, 6-турда америкалик Уэсли Со билан ўйин кутмоқда. 

Иккинчи гуруҳда Хикару Накамура 6 очко билан пешқадам бўлиб турибди. Иккинчи ўриндаги Магнус Карлсенда ҳам шунча очко мавжуд.

Эслатиб ўтамиз, шахматчилар тур доирасида 2 та партия ўтказишади. Ғалаба қозонган шахматчи 2 очкога эга бўлади.