Алькараз дунёнинг биринчи ракеткасини енгиб, Пекин турнири чемпионига айланди

Ҳал қилувчи финал учрашувида дунёнинг биринчи ракеткаси Янник Синнер рейтингнинг учинчи поғонасидан жой олган испаниялик Карлос Алькаразга қарши кортга чиқди. Уч соату 23 дақиқа давом этган баҳсда Алькараз иродали ғалабага эришди - 6/7(6), 6/4, 7/6(3).

Теннисчиларнинг ўзаро учрашувларида Карлос 7:4 ҳисобида олдинда бормоқда. Иккала теннисчи ҳам 6 тадан эйс зарбасини амалга оширган. Қўшхатолар италияликда кўпроқ бўлди - 4 га 2. Брейклар бўйича устунлик табиийки, ғолиб теннисчи томонда бўлди - 3 га 2. 

Эътиборлиси, Алькараз ҳал қилувчи учинчи сетнинг тай-брейкида 0:3 ҳисобида ютқазаётганди. У Янникнинг 15 та ғалабадан иборат ажойиб сериясига барҳам берди. Бу испан теннисчисининг мавсумдаги тўртинчи, фаолиятидаги 16-соврин бўлди. Карлос 500 рейтинг очкоси ва 695,750 АҚШ доллари миқдоридаги пул мукофотини қўлга киритди. Синнер эса 330 очко ҳамда 374,340 долларга эга бўлди.