Амалдаги жаҳон чемпиони Бельгиядаги турнир ғолиби бўлди

Дунёнинг энг кўзга кўринган 10 нафар гроссмейтери – Магнус Карлсен (Норвегия), Вишванатан Ананд (Ҳиндистон), Левон Аронян (Арманистон), Фабиано Каруана (АКШ), Аниш Гири (Голландия), Владимир Крамник (Россия), Хикару Накамура (АҚШ), Максим Вашье-Лаграв (Франция), Веселин Топалов (Болгария), Уэсли Со (АҚШ) иштирокидаги мусобақанинг кеча рапид йўналиши бўйича баҳслар якунланди.

Турнирнинг иккинчи кунида ҳам спортчилар тўрт партия баҳс юритишди. Унда амалдаги жаҳон чемпиони Магнус Карлсен барча ўйинларни ўз  фойдасига ҳал қилиб, якунда 8 очко жамғарди. (Рапид қоидасига кўра ғалаба учун 2, дурангга 1 очко берилади).

Икки кунлик мусобақа якунларига кўра норвегиялик Магнус Карлсен жами 12 очко жамғариб, бош совринни қўлга киритди. Америкалик Уэсли Со 11, арманистонлик  Левон Аронян ва Хиндистон  вакили Вишванатан Ананд 10 очко билан кейинги совринли ўринларни банд этишди.

Шунингдек, Фабиано Каруана 9, Веселин Топалов, Максим Вашье-Лаграв, Аниш Гири 8, Владимир Крамник, Хикару Накамура 7 очко тўплади. Бугун  нуфузли мусобақанинг блиц йўналиши бўйича баҳслари бошланади. 18  партиядан иборат учрашувлар айлана тизимда ўтказилади. Ҳар бир партия 5 дақиқадан иборат бўлиб, бир юришга 2 сониядан қўшиб берилади. Блиц  йўналиши бўйича мусобақа ғолиби эртага аниқланади.