Ана холос. Дунёнинг биринчи ракеткаси уч ойга четлатилди

Бутунжаҳон антидопинг агентлиги (ВАДА) хабарига кўра, италиялик теннисчининг жазо муддати 2025 йилнинг 9 февралидан 4 майига қадар амалда бўлади. Синнер "Катта Дубулға" туркумига кирувчи "Ролан Гаррос" турниридан яна мусобақаларда қатнашиши мумкин. Франция Очиқ чемпионати 19 май куни старт олади.

Маълумот учун, ўтган йилнинг март ойида Янникнинг допинг учун топширган тест-таҳлили икки бор ижобий натижа берганди. Унда тақиқланган стероид клостебол моддаси аниқланган эди. Август ойида Теннисда ҳалоллик ва шаффофликни таъминлаш халқаро агентлиги (ITIA) Синнерни айбсиз деб топди. Лекин ВАДА ташкилоти бунга нисбатан апелляция бериб, теннисчини бир йилдан икки йилгача муддатга четлатиш кераклиги талаб қилди. Охир-оқибат Спорт арбитраж суди (CAS) ВАДАнинг талабини қаноатлантирди.