27 апр 14:07
Янгиликлар

Теннис

Арина Соболенко Мадридда чемпионлик ҳимоясини бошлади

Дунёнинг иккинчи ракеткаси Арина Соболенко Мадридда ўтказилаётган WTA 1000 тоифасига кирувчи нуфузли турнирнинг амалдаги ғолибаси ҳисобланади.

Беларуслик теннис маликаси чемпионлик ҳимоясини муваффақиятли бошлаб олди. У илк даврада WTA рейтингида 48-ўринни эгаллаб турган польшалик Магда Линеттни уч сет натижасига кўра мағлубиятга учратди - 6/4, 3/6, 6/3.

Теннисчиларнинг ўзаро учрашувларидаги ҳисоб янада йириклашди - 4:0. Икки соату 12 дақиқа давом этган баҳсда Соболенко 10, Линетт 3 та эйс зарбасини амалга оширган. Қўшхатолар 6 га 1, брейклар 2 га 1 кўринишида Арина фойдасига бўлди.

Энди Соболенко учинчи босқичда америкалик Робин Монтгомерига қарши кортга чиқади. Океан орти вакиласи иккинчи даврада британиялик Кэти Бултердан 1/6, 6/3, 6/4 ҳисобида устун келган.