ATP Finals. Зверевни мағлуб этган Синнер муддатидан олдин 1/2 финалга чиқди

Италиялик теннисчи ATP рейтингида учинчи ўринни эгаллаб турган германиялик Александр Зверевни ортиқча қийинчиликсиз мағлубиятга учратди - 6/4, 6/3. Янник теннисчиларнинг ўзаро учрашувлари ҳисобида олдинда бормоқда - 6:4. 

Тўқсон саккиз дақиқа давом этган баҳсда Синнер 12, Зверев 7 та эйс зарбасини амалга оширган. Иккала теннисчи ҳам қўшхатога йўл қўймади. Брейклар бўйича табиийки, ғолиб теннисчи устунлик қилди - 2 га 0. 

Шу тариқа, Синнер Бьорн Борг гуруҳида икки ғалаба билан муддатидан аввал 1/2 финалга йўл олди. У сўнгги учинчи турда америкалик Бен Шелтонга қарши кортга чиқади. Бен иккала учрашувда мағлубият аламини тотиб кўрди. Зверев ва канадалик Феликс Оже-Альяссим ҳисобида биттадан ғалаба бор. Айнан икки теннисчи учинчи турда ўзаро иккинчи 1/2 финал чиптасини ҳал қилишади.