Азизжон Камилов Бишкекда Осиё дзюдо федерацияси президенти билан учрашди

Суҳбат давомида ўзаро ҳамкорлик масалаларига доир бир қатор режалар муҳокама қилинди.

Қайд этиш жоиз, дзюдочиларимиз Олимпия ўйинларида терма жамоамиз ҳисобига илк медалларни тақдим этиб келишган. Бу эса мамлакатимизда ушбу спортнинг янада оммалашишига катта турткидир. Обайд ал Анзи суҳбат давомида ўтган ой Тошкент мезбонлик қилган “Катта дубулға” мусобақасининг юқори савияда ташкил этилганини алоҳида таъкидлади. Ўз навбатида Азизжон Камилов Президентимизнинг юртимизда соғлом турмуш тарзи, жисмоний тарбия ва спорт тарғиботини ҳар томонлама қўллаб-қувватлаётгани ҳақида гапириб берди.

Учрашувда расмийлар келаси йил мамлакатимизда ўтадиган катталар ўртасидаги жаҳон чемпионатига тайёргарлик, ушбу спорт турини Ўзбекистонда янада оммалаштириш, “Мактабларда дзюдо” дастури бўйича ҳамкорликни мустаҳкамлаш масалалари бўйича атрофлича суҳбатлашишди. Якунда Азизжон Камилов самимий мулоқот учун ташаккур айтиб, Ўзбекистон дзюдо федерациясининг эсдалик совғаларини тақдим қилди.