Баскетбол. Қаршида ҳам кучлилар сараланди

“Баркамол авлод” жисмоний тарбия ва спорт жамияти Қашқадарё вилояти минтақавий бўлими томонидан ўтказилган мазкур вилоят саралаш беллашувларида барча туман ва шаҳарлардан ғолибликни қўлга киритган жамоалар мамлакат босқичига чиқиш учун муросасиз кураш олиб боришди. 

Ушбу саралашда Чироқчи, Қамаши, Косон, Китоб, Ғузор, Қарши сингари туман ўқувчи-ёшларининг фаоллиги яққол сезилиб турди. Якуний натижаларга кўра Қарши шаҳридаги коллежларда таҳсил олаётган ўқувчилардан иборат терма жамоа фахрли биринчи ўринни эгаллаб, Бухорога йўл оладиган бўлди.

Иккини ўрин Қарши тумани ёшларига насиб этган бўлса, учинчи ўринни  Ғузор тумани жамоаси қўлга киритди. Ғолиб ва совриндор жамоалар диплом ва эсдалик совғалари билан мукофотланишди.  

Сардор Эшбобоев, “Баркамол авлод” жисмоний тарбия ва спорт жамияти Қашқадарё вилоят минтақавий бўлими раис ўринбосари:

- Мусобақада иқтидорли спортчи-ўқувчиларни аниқлаш осон кечмади. Бугун жисмоний тарбия ва спортга бўлган юксак эътибор туфайли энг олис ҳудудларимизда ҳам жамоавий спорт турлари яхши оммалашаётганини бугунги баскетбол мусобақасида кузатиб, гувоҳи бўлдик. Бухорога борадиган жамоани аниқлаб олдик. Ўйлайманки, жамоамиз тўртинчи босқичда кучлилар қаторидан жой олиш учун бор маҳоратларини ишга солади. 

Илҳом Раҳмонов тайёрлади