Белбоғли кураш. Боғдодда Ўзбекистон кубоги беллашувлари ўтказилмоқда

Ўзбекистон Республикаси Туризм ва спорт вазирлиги ҳамда Ўзбекистон белбоғли кураш федерациясининг йиллик – тақвим режасидаги мазкур мамлакат кубоги баҳсларида  Қорақалпоғистон Республикаси, Тошкент шаҳри ва  вилоятлардан  300 нафарга яқин  ёш полвонлар ғолиблик учун кураш тушишмоқда. Мазкур кубок баҳсларида дастлаб, мусобақанинг тантанали очилиш маросими ташкил этилди. Маросимда Боғдод тумани ҳокими Восилжон Назаров, Фарғона вилояти Туризм ва спорт бош бошқармаси бошлиғи ўринбосари Шерзод Ўсарқулов, Ўзбекистон белбоғли кураш федерацияси бош котиби Абдихалил Маликов, белбоғли кураш бўйича катталар ўртасида терма жамоа бош мураббийи, халқаро тоифадаги ҳакам Аъзамжон Шокиржоновлар иштирок этиб, ёш полвонларни қутлаб, уларга омад тилашди.   

Юқори савияда ташкил этилган ушбу мамлакат кубогида ўғил болалар белбоғли курашнинг эркин ва классик йўналишларида 11 та вазн тоифасида, қизлар эса эркин йўналишда 7 та вазн тоифасида ғолиблик учун кураш тушишмоқда.

Беллашувлар якунига етгач, кучли учликдан жой олган полвонлар билан танишишингиз мумкин. Мусобақа 10 октябрга қадар давом этади.    

Илҳом РАҲМОНОВ тайёрлади