Белбоғли кураш. Тўрақўрғонда "Дўстлик" турнири ўтказилади

Наманганда айни 65- халқаро гуллар фестивали доирасида бўлиб ўтган мазкур "Дўстлик" халқаро турнирида Россия, Ҳиндистон ҳамда мамлакатимизнинг энг номдор полвонлари ўзаро куч синашишди.
Тўрақўрғон туман спорт мактабида юқори савияда ўтган мазкур халқаро турнирда дастлаб тантанали очилиш маросими ташкил этилди. Маросимда Наманган вилояти ҳокими ўринбосари Отабек Бозоров, Тўрақўрғон туман ҳокими, вилоят белбоғли кураш федерацияси раиси Шерали Қосимов, Осиё белбоғли кураш конфедрацияси президенти Мўмин Муратов, Ўзбекистон белбоғли кураш федерацияси раиси Равшан Дастиров ҳамда Россия ва Ҳиндистон спорт делегациялари раҳбарлари иштирок этишди.

Кун давомида кўп сонли мухлислар олқиши остида ўтган беллашувларда полвонлар бор маҳоратларини ишга солиб, ғолиблик учун муросасиз кураш олиб боришди.Ҳар бир вазн тоифасида совриндорлар сафидан жой олиш полвонлар учун осон кечмади. Шу тариқа шиддатли кечган беллашувларнинг якуний натижаларига кўра, умумжамоа ҳисобида энг кўп медаллар жамғарган Ўзбек полвонлари фахрли биринчи ўринни қўлга киритишди. Россия терма жамоаси иккинчи ўринни эгаллаган бўлса, ҳиндистонлик полвонларга учинчи ўрин насиб этди.

Ғолиб ва совриндорлар диплом, медаль ва қимматбаҳо эсдалик совғалари билан тақдирланишди.

Таъкидлаш жоиз, спортчиларни кураш майдонига чорлаган ушбу халқаро турнирдан кўзланган мақсад—Юртимизда спортни, хусусан, миллий спорт туримиз белбоғли курашни янада ривожлантириш, миллий қадриятларимизни асраб авайлаш ва халқаро дўстлик ришталарини мустаҳкамлашдан иборат.

Илҳом РАҲМОНОВ тайёрлади